Anima Cappiata
Ballu di rime

Diana-Eva Teillaud-Muraccioli

Incù l'accunsentu di u bloggu https://donnalba.wordpress.com/

Eppo ti scrivu.
Balla a penna.
Sguilla, serena.
Tremulu in schiena.
Lasciu risplende
A luna piena
In le mio vene.
Ballata bella
Chì mi rivene.
 
Eppo ti scrivu.
Balla a penna.
Si face fata.
Curriculeghja.
Pare infiarata.
Giranduleghja,
Ogni infrasata
Chì saltichjeghja,
À l’ispensata.
 
Eppo ti scrivu.
Scrivacciulata
Chì passa è vene.
Ballerinata,
In carte scene.
Ne trimuleghja
L’anima lene.
Balla a penna
…Ballu cun ella…


Commentaires (0)
Novu cumentu :