Anima Cappiata
Girandulata

Charles Eissautier

Prima di vedelli Lisandru sentì u tintinnime. Fighjava u volu d’un filanciu sopra u fiume, culà ver di a Petra Maiò, quandu cuminciò à percepì un sonu furesteru, metallicu, è seccu. Orichjò, avà attente : qualchissia cullava, affiancatu d’un chjucchittime regulatu chè facenu i bastoni. Di a so posta, ùn pudià vede u chjassu piattatu ch’era par un poghju petricosu. Dopu una stonda, vidì quesse visture culurite di rossu è di giallu chì imbruttava a machja verdicante : un paghju chì cullava abbastanza prestu, malgratu chì sianu carcati cù sacchi pisanti. Ellu, di grande statura, atleticu (bè strutturatu), in capelli, (o capellilongu), ella più minuta, vestuta à quella volta, cù un ridicula baretta giallaccia chì lu rimintava e barette Bigeard di a guerra d’Algeria…
Salutonu lu cù un "Bonghjornu Monsieur". Rispose à u so salutu :
 - Salute ! Allora in spassighjata ?
 - Una a girandulata : facemu un mon-te Stel-lo dice l’omu staccendu e sillabe sicchè Lisandru messe un pezzu per capì.
 - Ùn hè micca luntanu ; n’avete ancu per una ora à u più !
L’omu surtì u so telefuninu di a so stacca è osservò u screnu.
 - Mì, simu quì, disse à a dona.
 - Sì sicuru ? Ùn ci hè micca custruzzione nantu à a carta.
 - Hè certu u GPS. Scusate mi, o monsieur, cumu si chjama stu locu ?
 - I Prunelli.
 - Ah !
Poi, fissò u fucile, appiccatu nant’à u muru :
 - Un aggrondu per a caccia ?
 - Innò hè un stazzu. À dì la franca, era un stazzu qualchì annu fà. D’estate era a capanna di u pastoru, nantu à sta petra allisciata ci punianu i stagnoni di latte per mettelli nantu u mulu. È daretu à stu pentone viderete a mandria per tene e capre a notte.
Ma ùn parinu micca l’imbaghi tutti sti spiegazioni… Ùn furzighjò micca.
 - Possu piglià un ritrattu cun voi ?
 - Cum’è vo vulete !
 
Tramindui si posenu vicinu à ellu, fiancu à fiancu, l’omu inalburò u so telefuninu è Lisandru sentì u cliccu chì imita a chjusura di u diaframmu d’un apparechju fotograficu. Sarà forse un "selfie". Imbè ! Qui, in mo muntagna ! Pensò Lisandru in pettu.
Poi, a dona, surtì una buttiglia d’acqua minerale, biì una tasa è l’offrì à u so cumpare, dicendu.
 - Speru chè abbiamu abbastanza d’acqua, speru !
 - Ci hè una surgente, culà, à pena sottu quellu cispugliu.
 - Hè acqua propriu putabile ?
 - Putabile ! putabile ! Ripetì a parolla parechji volte, tantu chì a dumanda l’avia abbacciacatu.
 - Puabile ? Ùn ci n’hè micca acqua più deliziosu ch’è questa. A vi dicu franca !
A dona falò subbitu, girò un pocu è si riturno buttiglia viota.
In a troscia, ci ava un catellu muntaninu giallu è neru : ùn aghju micca avutu u curagiu di m’avvicinà.
 - Lascia corre, ademucine disse l’omu. Avvedeci, o Monsieur.
Li vidi parte nantu u ghjassu, caminà centu metri, piantassi vicinu una mansa recente di petricaglie, guardà u telefoninu, è l’omu tende u bracciu, indettendu un puntu luntanu. Baulli ! S’hanu da piglià troppu à manu mancu da u ghjassu di Monte Capra ! Una à duie ore di più per u menu ! "Ùn dà capu à u sumeru", dicìa u babbu.
Stu ghjassu, l’avìa tantu percorsu ! Pareghji volte l’annu, cullava sin’à a bocca Santa Maria, pudìa fà un ripastu à u stazzu di Teghjime è falà dritu drittu à u paese. Lu piacìa di girandulà à l’azardu per sti lochi tantu ch’ellu cunnoscìa tutti i sicreti, culà duve i cignali chì si ne vanu à beie à u fiume, i pughjali duve si coglienu, dopu e prime pioge di fine d’aostu, sti funghi propiu gustosi chì si chjamanu e tasgie, l’appiatu duve u pastore cunservava qualchì casgi per i so spuntini, una gruttella, quasi una tana, induve si vulìa à s’acciuccià per entre daretu un panculu di serpentina, i nomi di e piante è e so adupratu, a scopa, quella per piccià u focu è quella per fà e spazzole, e surgente guasi invisìbile frà l’albitri, l’antiche aghje, testimunianza di i tempi quandu u granu crescia per tutti sti lochi, è u muscu di a machja ch’ellu ingollia cù bisestu. Era u so universu, ch’ellu spartia cù i parenti chi cum’è ellu l’avianu percorsu, travagliatu, seminatu di sudore è ognitantu di u sangue.
Ogni locu, ogni scogliu, ogni ripata avia u so propiu nome. Un chjassu di parolle chè pudia si coglie à so sensu per fà mazzuli di fole, per cuntà o sinnià a storia di a muntagna. Li piaciava di si tratichjà cù ste parolle, falle ballà in a bocca, le mughjà di pettu à u ventu per dì quantu era felice d’esse quì, annigatu in sti cuntorni.
Frappocu, à sapìa, ùn pederìa più culà quassu. E gambe, u spinu, l’artrosa, propiu a vichjaia, e cose di a vita, inesorabile, ch’ellu, serenu, accettava cù fatalità. Ma tutte ste parolle chì si scappanavu cù quelli chì l’avianu adupratu è tramessu à ogni leva l’una apressu l’altra, di natura, ch’elle tucava à a vita di ogni stonde cum’è evidenza assuluta. È chì ava, in una cria di tempu, s’aggrunchjanu, annigatu in a mimoria di l’anziani, mentre chè i furesteri ceghi è sordi passighjanu sti lochi oramai silenziozi, ingordi di dislivelli, di camini annutati è di ricordi inchjustrati à fondu di i so dischi duri. A robu di pensà, ùn pudì.
In fini di matinata, di colpu si pesò pareghje banchi di nebbia chì coprìanu i lochi pianu à pianu di tuvaglie zeppe è cutunose. S’affaccava u mare per schjarite accurte è tutti i cuntorni di a serra avianu statu squassati. Turno à pensà à i dui marchjatori : avianu da amparà à e so spese chè a muntagna corsa, ùn si rigalava facilmente, cù e so manere di paradisu assuliatu ! Di quale aiutu li saria a tecnologia ? U peghju, averianu nuttighjatu à u freddu ! Averianu una stalvatoghju di vacanze à cuntà à l’amichi citadini.
Prima di si ne falà, decidì di fà una pusata. Entrì in u fondu di u stazzu è si chjinò nant’à a petra piana, cù a so bisaccia in modu di capatoghju. S’addurmintò prestu prestu. Sunniava. Acchjiccava un essere vestitu cù una pelle d’orsu, cum’è sti orchi chì spaventanu i zitelli u ghjornu di u Carnavale. Era vicinu à l’agguantà quandu l’animale si vultò, s’affacandu di fronte : era un cignale. Senza riflete, sortì un cultellu di a so stacca è si lampò contr’à ellu cù fuga. U cignale sfalò di fiancu : fissava Lisandru chì vidì a so propia facia rispechjassi in u so oghju. Lapidu di sudore, si discitò in un trasaltu. Lu vense un tamantu tardellu, un spaventu subitaniu. Un grande dulore in u pettu. Strinse le mani nantu u corre, fiatu falatu. Si sprunfundò in un bottu.
À l’imbrunì, in u paese, ebbenu i penseri per Lisandru. Qualchi persona andonu à a so scontru in u chjassu di u Stellu. Toccatu l’Acqua morte, scuntronu à i dui marchjatori chì si ne falavanu.
 - Avete vistu un omu per sti lochi ?
 - Iè, sta matina, accantu à u stazzu, quassù.
 - È à u ritornu l’avete vistu ?
 - Innò : ci simu persi…Avemu pigliatu per l’altra ripa di u fiume. Ma, appena più insù, ci hè un cignale feritu, allungatu nantu l’orlu di u ghjassu.


Commentaires (0)
Novu cumentu :