Anima Cappiata
Ritornu

Maria Stella Sicurani

Simu lu nove di nuvembre di l’annu 1998, aghju trent’anni è Mamma ùn ci hè più. Un si n’hè micca andata ghjè u cancaru chì a ci hà pigliata. Dopu à tant’anni passati in Parigi, ritornu in lu mio paisolu di Castagniccia per un ultimu addiu. Appena ghjunta nant’à l’isulella, accarizzata da a purezza di l’aria, rivecu a bellezza di a natura chì mi mancava tantu. Nant’à a strada, ùn mi possu impedisce di guardà in tornu à mè. Guasì tutti l’arburi eranu spugliati è un ventulellu frescu stuzzicava e qualchì fronda chì luttavanu per ùn cascà. Sboccu u Ponte Biancu videndu i castagni è e leccie longu à la strada, tandu a sò chì u paese ùn hè più tantu luntanu.
Ghjunta in paese, subbitu subbitu Ziu Filippu vene à basgià mi è ùn possu chè rimarcà quant’ellu hè invechjatu. Avemu principiatu à chjachjarà è quessa durante tutta a ghjurnata. M’hà imparatu chì Zia Lucia era malata è ch’ella ùn pudia, mancu più marchjà, chì Antone u pastore s’avia lasciatu vacche è pecure per marità si cù una chinese chì campava in Corti. E dopu hà cuminciatu à cuntà mi qualchì affarucciu ch’eo avia fattu essendu chjuca è mi dicia : "Ti n’arricordi di quandu…"
 
E tandu mi ramentu… Mi ramentu a mio zitellina, quandu appena sunnate e sett’ore, eramu arritti è pronti à andà à cercà l’ove in lu pullinaghju, dopu avè muntu e capre cù Babbu. Quandu andavamu in Monte d’Olmu à guardà u sole pisà si è ch’ellu dava à tutta a Casinca un culore di vinu. Quandu dopu à qualchì ghjornu di tempacciu andavamu, vechji è zitelli à cercà i funghi. Quandu l’anziani di u paese ci cuntavanu fole è sturiette in lingua corsa è chè no passavamu dopu meziornu sani à ghjucà à carte dopu à a siesta. E chì per finsice la ghjurnata, da la mio finestra cuntemplava u sole, chì si chjinava daretu à lu San Petrone. Tandu ùn aviamu "appareil photo", ma ogni stonda hè cum’è un ritrattu in la mio memoria.
Ma quì, oghje chì hè oghje, tuttu hè scambiatu, case è strade rifatte, turisti stallati, mere pinzutu elettu, si sentenu di più claxon di vitture chè tintene ribumbà, mancu più u ghjallu si sente cantà. Avà i zitelli stanu chjosi in casa tutt’a ghjurnata à ghjucà nant’à l’ordinatore. I grandi, elli, sò davanti à a televisiò à stà à sente e nutizie di u mondu sanu invece di piglià quelle di i so vechji. Quandu si sorte per ste strette diventati carrughji ùn si sente chè francese, mancu più una parulletta di corsu. E la sera quandu dò un’ochjata à la finestra ùn vecu più quellu San Petrone, ma vecu una muntagna d’appartamenti. Iè, quì tuttu hè scambiatu ma nunda hè megliu.
Di stu scambiamentu, ore sane puderia parlà vi ne, ma troppu male mi face è in CampuSantu mi tocca à andà. Eccu mi, ci sò, u core tristu è u spiritu altrò, vecu nant’à e croce i nomi di tutti quelli ch’anu incantatu a mio zitellina. E tandu mi dumandu perchè, iè perchè ? Perchè sò andata à studià in Parigi ? Perchè mi sò maritata cù un pariginu ? Perchè ùn sò micca rivenuta in Terra Santa cù i mei ? Perchè l’omu vole sempre di più ch’ellu ùn hà digià ? Prima per risponde à le mio dumande ci era la mio cara Mamma, ma oghje, aghju trent’anni è Mamma ùn ci hè più. 


Commentaires (0)
Novu cumentu :